উদ্যোগী হওঁ আহাঁ: ASSEB দশম শ্ৰেণীৰ অসমীয়া (MIL) সমাধান
One-time PDF: this chapter only. A private link is emailed to you and stays valid for 7 days with unlimited downloads. Learn more
ASSEB-ৰ অধীনত (পূৰ্বতে SEBA) অধ্যয়ন কৰি থকা শিক্ষাৰ্থীসকলৰ পাঠ্যসূচীৰ অন্তৰ্গত ASSEB দশম শ্ৰেণীৰ অসমীয়া (MIL) বিষয়ৰ অধ্যায় ৬. উদ্যোগী হওঁ আহাঁ-ৰ সাৰাংশ, প্ৰশ্নোত্তৰ, সমাধান, নোটছ, বহুনিৰ্বাচনী প্ৰশ্ন (MCQ), অতিৰিক্ত অধ্যয়ন সামগ্ৰী, PDF আৰু গাইড লাভ কৰক। অৱশ্যে, এই সমাধানসমূহ কেৱল তথ্যসূত্ৰ হিচাপেহে ব্যৱহাৰ কৰিব লাগে আৰু প্ৰয়োজন অনুসৰি সংশোধন বা পৰিবৰ্তন কৰিব পাৰি।
সাৰাংশ (Summary)
‘উদ্যোগী হওঁ আহাঁ’ নামৰ পাঠটিৰ লেখক হ’ল দেৱজিৎ ভূঞা। এই পাঠটিত দশম শ্ৰেণীৰ শিক্ষক প্ৰকাশ গোস্বামীয়ে ছাত্ৰ-ছাত্ৰীসকলৰ সৈতে উদ্যোগী হোৱাৰ বিষয়ে আলোচনা কৰিছে। অসমীয়া প্ৰবচন ‘উদ্যোগী পুৰুষ সিংহৰ সমান, এলেহুৱা কাপুৰুষৰ নিচান’ ব্যৱহাৰ কৰি তেওঁ বুজাইছে যে পৰিশ্ৰমী মানুহ সিংহৰ দৰে শক্তিশালী আৰু সাহসী হয়। বিপৰীতে এলেহুৱা মানুহবোৰ ভয়াতুৰ হয়। এজন উদ্যোগী হ’বলৈ কোনো ডাঙৰ ডিগ্ৰীৰ প্ৰয়োজন নাই। কিন্তু সফল হ’বলৈ হ’লে মানুহৰ ধৈৰ্য্য, একাগ্ৰতা, সময়ানুবৰ্তিতা আৰু আত্মবিশ্বাস থাকিব লাগিব।
শিক্ষকে কথাটো বুজাবলৈ চাইকেল চলোৱাৰ সুন্দৰ উদাহৰণ দিছে। চাইকেল শিকোতে মানুহ পৰে আৰু আঘাত পায়। কিন্তু যিয়ে হাৰ নামানি বাৰে বাৰে চেষ্টা কৰে, তেওঁহে চাইকেল চলাবলৈ শিকে। ব্যৱসায়ো ঠিক তেনেকুৱা। প্ৰথমবাৰতে বিফল হ’লেও চেষ্টা এৰি দিব নালাগে। ক’কা ক’লাৰ এটা বিজ্ঞাপনৰ উদাহৰণেৰে তেওঁ বুজাইছে যে সফল হ’বলৈ হ’লে ক্ৰিকেট খেলুৱৈৰ দৰে দিনে-ৰাতি কেৱল নিজৰ লক্ষ্যৰ কথাহে ভাবিব লাগে। কোনো বেয়া পৰিস্থিতি আহিলে ধৈৰ্য্য ধৰি সুযোগৰ বাবে অপেক্ষা কৰিব লাগে।
পাঠটোত ইনফচিচ কোম্পানীৰ প্ৰতিষ্ঠাপক নাৰায়ণ মূৰ্তীৰ বিষয়ে কোৱা হৈছে। তেওঁ এজন অতি সাধাৰণ ঘৰৰ ল’ৰা আছিল। তেওঁৰ প্ৰথম কোম্পানীটো বন্ধ হৈ গৈছিল। কিন্তু তেওঁ হাৰ নমনা মনোভাবৰ বাবে পত্নীৰ পৰা দহ হাজাৰ টকা লৈ নতুন কোম্পানী আৰম্ভ কৰিলে আৰু সফল হ’ল। সেইদৰে ধীৰুভাই আম্বানীয়ে পেট্ৰল পাম্পত কাম কৰি জীৱন আৰম্ভ কৰিছিল। কম পঢ়া-শুনা আৰু টকা নোহোৱাকৈও তেওঁ এজন ডাঙৰ উদ্যোগী হ’ল। টমাচ আলভা এডিচনে ইলেট্ৰিক বাল্ব বনাবলৈ বাৰে বাৰে চেষ্টা কৰিছিল। তেওঁ বিফলতাকো একো একোটা শিক্ষা হিচাপে লৈছিল।
সকলো কামৰ বাবে একে শিক্ষাগত অৰ্হতাৰ প্ৰয়োজন নাই। এখন গেলামাল বা শাক-পাচলিৰ দোকান খুলিবলৈ বুদ্ধি আৰু can-do মনোভাৱ থাকিলেই হয়। কিন্তু মটৰ গেৰেজ, বিউটি পাৰ্লাৰ বা ম’বাইল মেৰামতিৰ দোকান খুলিবলৈ বিশেষ কৌশল বা দক্ষতা শিকাটো জৰুৰী। আনহাতে, হস্পিতেল খুলিবলৈ হ’লে নিজে ডাক্তৰ হোৱাটো প্ৰয়োজন। যেনে অসমৰ জি.এন.আৰ.চি. (GNRC) হস্পিতেলৰ নোমল চন্দ্ৰ বৰা এগৰাকী সফল চিকিৎসক আৰু উদ্যোগী।
এজন উদ্যোগীয়ে নিজৰ জীৱিকা অৰ্জন কৰাৰ লগতে আনকো কাম দিব পাৰে। বৰ্তমান চৰকাৰে যুৱক-যুৱতীসকলক স্বাৱলম্বী কৰিবলৈ ‘মুদ্ৰা ঋণ’ আৰু ‘ষ্টাৰ্টআপ ইণ্ডিয়া’ৰ দৰে আঁচনিৰ জৰিয়তে সহায় কৰে। কলেজবোৰতো এই বিষয়ত প্ৰশিক্ষণ দিয়া হয়। সকলোৰে বাবে চৰকাৰী চাকৰি পোৱাটো সম্ভৱ নহয়। গতিকে ছাত্ৰ-ছাত্ৰীসকলে সৰুৰে পৰাই স্বাৱলম্বী হোৱাৰ বাবে মানসিকভাৱে সাজু হ’ব লাগে।
পাঠ্যপুথিৰ সমাধান (Textbook solutions)
ভাৱ-বিষয়ক
১। (ক) দশম শ্ৰেণীৰ শ্ৰেণীকোঠাত সোমোৱা শ্ৰেণী-শিক্ষক গৰাকীৰ নাম কি?
উত্তৰ: দশম শ্ৰেণীৰ শ্ৰেণীকোঠাত সোমোৱা শ্ৰেণী-শিক্ষক গৰাকীৰ নাম হৈছে প্ৰকাশ গোস্বামী।
(খ) শ্ৰেণী-শিক্ষকগৰাকীয়ে আলোচনা কৰিবলৈ লোৱা নতুন বিষয়টো কি আছিল?
উত্তৰ: শ্ৰেণী-শিক্ষকগৰাকীয়ে আলোচনা কৰিবলৈ লোৱা নতুন বিষয়টো আছিল কেনেকৈ এজন ব্যক্তিয়ে নিজকে এজন উদ্যোগী ব্যক্তি হিচাপে গঢ়ি তুলিব পাৰে।
(গ) এজন উদ্যোগী আৰু কৰ্মহীন নিবনুৱাৰ মাজত থকা ক্ষুদ্ৰ ব্যৱধান কি?
উত্তৰ: এজন উদ্যোগী আৰু কৰ্মহীন নিবনুৱাৰ মাজত থকা ক্ষুদ্ৰ ব্যৱধানটো হ’ল কেৱল এলাহ।
(ঘ) এজন সফল উদ্যোগী হ’বলৈ কি কি গুণৰ প্ৰয়োজন?
উত্তৰ: এজন সফল উদ্যোগী হ’বৰ বাবে প্ৰয়োজন হোৱা গুণসমূহ তলত উল্লেখ কৰা হ’ল:
১। ধৈৰ্য্য
২। একাগ্ৰতা
৩। নিয়মানুবৰ্তিতা
৪। সময়ানুবৰ্তিতা
৫। আত্মবিশ্বাস
৬। হাৰ নমনা মনোবৃত্তি
(ঙ) ক’কা ক’লা কোম্পানীৰ বিজ্ঞাপনটোত কোৱা কথাটো কি?
উত্তৰ: ক’কা ক’লা কোম্পানীৰ বিজ্ঞাপনটোত কোৱা কথাটো আছিল Eat cricket, sleep cricket, dream cricket, drink cricket।
(চ) নাৰায়ণ মূৰ্ত্তী কোন?
উত্তৰ: নাৰায়ণ মূৰ্ত্তী হ’ল ইনফচিচ কোম্পানীৰ প্ৰতিষ্ঠাপক তথা ভাৰতবৰ্ষ আৰু সমগ্ৰ বিশ্বৰ এজন সফল উদ্যোগী।
(ছ) বিজিতে ছাৰক উদ্যোগী সম্পর্কে কি কৈছিল?
উত্তৰ: বিজিতে উদ্যোগী সম্পৰ্কে ছাৰক কৈছিল যে উদ্যোগীসকল হ’ল এনে ব্যক্তি যিয়ে নিজে ব্যৱসায় বা উদ্যোগ আৰম্ভ কৰি কোনো বস্তু বা সেৱা বিক্ৰী কৰে। ইয়াৰ দ্বাৰা তেওঁলোকে নিজৰ জীৱিকা অৰ্জন কৰাৰ লগতে আনকো কৰ্মসংস্থান দিবলৈ সক্ষম হয়।
(জ) প্ৰথম অৱস্থাত উদ্যোগীয়ে কি কৰিবলৈ সাজু থাকিব লাগিব?
উত্তৰ: প্ৰথম অৱস্থাত এজন উদ্যোগীয়ে জোতা চিলাইৰ পৰা চণ্ডী পাঠলৈকে সকলো কাম কৰিবলৈ সাজু থাকিব লাগিব আৰু সৰুতে চাইকেল শিকাৰ দৰে বাৰে বাৰে পৰি আকৌ উঠি থিয় হ’বলৈ সাজু থাকিব লাগিব।
(ঝ) টমাচ আলভা এডিছনে ইলেকট্রিক বাল্ব তৈয়াৰ কৰাত বাৰে বাৰে বিফল হৈ কি কৈছিল?
উত্তৰ: টমাচ আলভা এডিছনে ইলেকট্রিক বাল্ব তৈয়াৰ কৰাত বাৰে বাৰে বিফল হৈ কৈছিল যে তেওঁ বিফল হোৱা নাই, তেওঁ কেৱল বুজি পালে যে ১০০০০ টা উপায়েৰে এই কামটো কৰিব নোৱাৰি।
২। চমুকৈ বুজাই লিখা:
(ক) ‘উদ্যোগী পুৰুষ সিংহৰ সমান, এলেহুৱা কাপুৰুষৰ নিচান।’—শিক্ষকগৰাকীয়ে কিয় এইদৰে ক’লে বুজাই লিখা।
উত্তৰ: শিক্ষকগৰাকীয়ে এইদৰে কৈছে কাৰণ এজন উদ্যোগী অৰ্থাৎ আণ্ট্ৰাপ্ৰিনিঅ’ৰ আৰু কৰ্মহীন নিবনুৱা ব্যক্তিৰ মাজত থকা আটাইতকৈ ক্ষুদ্ৰ ব্যৱধানটোৱেই হ’ল এলাহ।
যি ব্যক্তিয়ে এলাহ ত্যাগ কৰি কৰ্মত ব্ৰতী হয়, তেওঁ নিজকে উদ্যোগী হিচাপে সিংহৰ দৰে শক্তিশালী ৰূপত গঢ়ি তুলিব পাৰে। আনহাতে এলাহৰ বশৱৰ্তী হৈ থকা এলেহুৱা ব্যক্তিসকল জীৱনত পিছপৰি ৰৈ ভীৰু বা কাপুৰুষৰ দৰে পৰিচিত হয়।
(খ) সফল উদ্যোগী হ’বলৈ কিয় কঠিন?
উত্তৰ: সফল উদ্যোগী হোৱাটো কঠিন কাৰণ ইয়াৰ বাবে এজন ব্যক্তিৰ ভিতৰত বিশেষ কিছুমান মানসিক গুণ আৰু চৰিত্ৰৰ প্ৰয়োজন হয়।
সফল উদ্যোগী হ’বলৈ হ’লে এজন ব্যক্তিৰ মাজত ধৈৰ্য্য, একাগ্ৰতা, নিয়মানুবৰ্তিতা, সময়ানুবৰ্তিতা, আত্মবিশ্বাস আৰু হাৰ নমনা মনোবৃত্তি থাকিব লাগিব। যিহেতু সাধাৰণতে সকলো মানুহৰ মাজতে এই বিশেষ গুণসমূহ পোৱা নাযায়, সেইবাবেই সফল উদ্যোগী হোৱাটো অত্যন্ত টান কাম।
(গ) এজন উদ্যোগী হ’বলৈ যোৱাটোও চাইকেল চলাবলৈ শিকাৰ দৰে একক প্ৰচেষ্টাৰে কৰা কাম বুলি শিক্ষকগৰাকীয়ে কিয় কৈছে বুজাই লিখা।
উত্তৰ: চাইকেল চলাবলৈ শিকোঁতে প্ৰথম অৱস্থাত বহুত মানুহ চাইকেলৰ পৰা পৰি যায় আৰু হাত-ভৰিৰ ছাল-বাকলি এৰাই যায় বা হাত-ভৰিও ভাগে, কিন্তু যিসকলে ভয়তে পুনৰ চেষ্টা কৰিবলৈ এৰি নিদিয়ে তেওঁলোকেহে অৱশেষত চাইকেল চলাব পাৰে।
ঠিক সেইদৰে, উদ্যোগী হোৱাৰ পথতো প্ৰথম অৱস্থাত বিফলতা আহিব পাৰে। বহু লোকে প্ৰথম বা দ্বিতীয় বিফলতাতে চেষ্টা কৰিবলৈ এৰি দিয়ে। কিন্তু যিয়ে বিফল হ’লেও এৰি নিদি অবিৰতভাৱে লাগি থাকে, তেৱেঁই এদিন সফল উদ্যোগী হ’বলৈ সক্ষম হয়। সেয়েহে ইয়াক চাইকেল শিকাৰ দৰে এক একক প্ৰচেষ্টা বুলি কোৱা হৈছে।
(ঘ) উদ্যোগী কোনসকল ব্যক্তিক কোৱা হয় বুজাই লিখা।
উত্তৰ: উদ্যোগী হ’ল এনে কিছুমান ব্যক্তি যিয়ে নিজে কোনো নতুন ব্যৱসায় বা উদ্যোগ স্থাপন কৰে আৰু তাত কোনো বস্তু বা সেৱা বিক্ৰী কৰি নিজৰ জীৱিকা অৰ্জন কৰে। ইয়াৰ উপৰিও তেওঁলোকে সমাজৰ আন বহু লোককো কৰ্মসংস্থান প্ৰদান কৰিবলৈ সক্ষম হয়।
এনে ব্যক্তিয়ে নিজৰ ইচ্ছামতে নিজৰ সময়সূচী ঠিক কৰি লয় আৰু নিজৰ উদ্ভাৱনী শক্তি তথা কৰ্মশক্তিৰ জৰিয়তে নিজকে সমাজত প্ৰতিষ্ঠা কৰে।
৩। ইন্ফচিচ কোম্পানীৰ প্ৰতিষ্ঠাপক কোন? তেওঁ ভাৰতবৰ্ষ তথা বিশ্বৰ এজন সফল উদ্যোগী হোৱাৰ আঁৰৰ কাহিনীটো বৰ্ণনা কৰা।
উত্তৰ: ইন্ফচিচ কোম্পানীৰ প্ৰতিষ্ঠাপক হ’ল নাৰায়ণ মূৰ্ত্তী। তেওঁ ভাৰতবৰ্ষ তথা বিশ্বৰ এজন সফল উদ্যোগী হোৱাৰ আঁৰৰ কাহিনীটো সংগ্ৰামেৰে ভৰা আছিল।
নাৰায়ণ মূৰ্ত্তীৰ জন্ম কৰ্ণাটকৰ এক নিম্ন মধ্যবিত্ত পৰিয়ালত হৈছিল। তেওঁ কোনো সোণৰ চামুচ মুখত লৈ জন্ম হোৱা নাছিল। সৰুৰে পৰা এজন উদ্যোগী হোৱাৰ তেওঁৰ দুৰ্বাৰ হেঁপাহ আৰু হাবিয়াস আছিল। সেইবাবে তেওঁ অভিযান্ত্ৰিক শিক্ষা সমাপ্ত কৰি কিছুদিন চাকৰি কৰাৰ পাছতে চাকৰি ত্যাগ কৰে।
চাকৰি ত্যাগ কৰি তেওঁ প্ৰথমে ছফ্ট্ৰনিক্স নামৰ এটা কোম্পানী প্ৰতিষ্ঠা কৰে। কিন্তু প্ৰতিষ্ঠা কৰাৰ ডেৰ বছৰৰ পাছতে সেই কোম্পানীটো দেউলীয়া হৈ বন্ধ হৈ যায়। ইয়াৰ পাছত নাৰায়ণ মূৰ্ত্তীদেৱে পুনৰ চাকৰিত যোগদান কৰে যদিও অৱশেষত চাকৰি বাদ দি কেইজনমান বন্ধুৰ লগ লাগি ইন্ফচিচ নামৰ কোম্পানীটো আৰম্ভ কৰে।
এই কোম্পানীটো খুলিবৰ বাবে নাৰায়ণ মূৰ্ত্তীক তেওঁৰ পত্নীয়ে নিজৰ সাঁচতীয়া ধনৰ পৰা দহ হাজাৰ টকা আগবঢ়াই দিয়ে। নিজৰ ঘৰৰ পৰা অনা এই দহ হাজাৰ টকা মূলধনেৰে আৰম্ভ কৰা ইন্ফচিচ প্ৰথম অৱস্থাত বহুতো বাধা আৰু ঘাত-প্ৰতিঘাতৰ সন্মুখীন হৈছিল।
পৰৱৰ্তী সময়ত নব্বৈৰ দশকত তেতিয়াৰ বিত্তমন্ত্ৰীয়ে ভাৰতীয় অৰ্থনীতিক মুকলি কৰি দিয়াত ইন্ফচিচৰ হাতলৈ অফুৰন্ত সুযোগ আৰু সুবিধা আহে। ধৈৰ্য্য আৰু একাগ্ৰতাৰে সুযোগৰ অপেক্ষা কৰি উপযুক্ত সময়ত সঠিক পদক্ষেপ লোৱাৰ বাবে তেওঁ বিশ্বৰ ভিতৰত এজন সফল উদ্যোগী হিচাপে প্ৰতিষ্ঠিত হয়।
৪। “ছাৰ, এজন উদ্যোগী হ’বৰ বাবে শিক্ষাগত অৰ্হতা কেনেধৰণৰ হ’ব লাগিব?”—এইদৰে কোনে সুধিছিল? তাৰ উত্তৰত শিক্ষকে কি কৈছিল বুজাই লিখা।
উত্তৰ: এইদৰে প্ৰীতম নামৰ ছাত্ৰজনে সুধিছিল।
তাৰ উত্তৰত শিক্ষকে বুজাই কৈছিল যে এজন ব্যক্তিয়ে কোনটো দিশত উদ্যোগী হ’ব বিচাৰে তাৰ ওপৰত প্ৰয়োজনীয় শিক্ষাগত অৰ্হতাটো নিৰ্ভৰ কৰিব।
এখন ধাবা বা গেলামালৰ দোকান খোলাৰ বাবে অথবা এখন শাক-পাছলিৰ দোকান খুলি স্বাৱলম্বী হ’বৰ বাবে কোনো বিশেষ শিক্ষাগত অৰ্হতাৰ প্ৰয়োজন নাই। কিন্তু এইবোৰ ব্যৱসায়তো কৃতকাৰ্য্যতা লাভ কৰিবলৈ বুদ্ধি আৰু সাধারণ জ্ঞানৰ প্ৰয়োজন হয়।
আনহাতে, এখন বিউটি পাৰ্লাৰ, মটৰ গাড়ী ভাল কৰা গেৰেজ, ম’বাইল ফোন বা টিভি ভাল কৰা দোকান খুলিবৰ বাবে নিজৰ সেই কামৰ কৌশল থকাটো অতি প্ৰয়োজন। কেৱল আনৰ ওপৰত নিৰ্ভৰ কৰি এনেবোৰ ব্যৱসায়ত সফলতা লাভ কৰিব নোৱাৰি।
বৰ্তমান সময়ত প্ৰযুক্তি, তথ্যপ্ৰযুক্তি আৰু জ্ঞানৰ ওপৰত ভিত্তি কৰি গঢ় লোৱা অৰ্থনীতি আৰু সমাজ ব্যৱস্থাত উদ্যোগী হ’ব বিচাৰিলে সংশ্লিষ্ট বিষয়ৰ শিক্ষা আৰু জ্ঞান আহৰণ কৰাটো অতি গুৰুত্বপূৰ্ণ। কম্পিউটাৰ ইঞ্জিনিয়াৰিং, ইলেকট্ৰনিক্স ইঞ্জিনিয়াৰিং বা এমবিএ আদি ডিগ্ৰী আহৰণ কৰি তথ্যপ্ৰযুক্তিৰ ব্যৱসায় কৰিলে কৃতকাৰ্য্যতা লাভৰ সম্ভাৱনা বৃদ্ধি পায়। একেদৰে এখন হাস্পতাল বা নাৰ্ছিং হোম প্ৰতিষ্ঠা কৰিবলৈ নিজে এজন চিকিৎসক বা এমবিবিএছ ডিগ্ৰীধাৰী হোৱাটো প্ৰয়োজনীয়।
৫। “এজন উদ্যোগী হোৱা যিমান সহজ, সফল হোৱাটো কিন্তু সিমান সহজ নহয়।”—কথাষাৰ পাঠৰ আধাৰত বুজাই লিখা।
উত্তৰ: এজন উদ্যোগী হোৱাটো আটাইতকৈ সহজ কাম কাৰণ ইয়াৰ বাবে কোনো বিশ্ববিদ্যালয়ৰ ডাঙৰ ডিগ্ৰীৰ প্ৰয়োজন নহয়। এজন উদ্যোগী আৰু এজন কৰ্মহীন নিবনুৱাৰ মাজত থকা একমাত্ৰ ক্ষুদ্ৰ প্ৰভেদটো হ’ল এলাহ। কিন্তু ইয়াৰ বিপৰীতে এজন সফল উদ্যোগী হোৱাটো আটাইতকৈ কঠিন কাম।
সফল উদ্যোগী হ’বৰ বাবে ধৈৰ্য্য, একাগ্ৰতা, নিয়মানুবৰ্তিতা, সময়ানুবৰ্তিতা, আত্মবিশ্বাস আৰু হাৰ নমনা মনোবৃত্তিৰ প্ৰয়োজন হয়। সকলো মানুহৰে ভিতৰত এই বিশেষ গুণসমূহ নাথাকে।
প্ৰথম অৱস্থাত এজন উদ্যোগীয়ে জোতা চিলাইৰ পৰা চণ্ডী পাঠলৈকে সকলো কাম কৰিবলৈ সাজু থাকিব লাগে। সৰুতে চাইকেল চলাবলৈ শিকাৰ দৰে উদ্যোগী হোৱাৰ প্ৰচেষ্টাতো বহুবাৰ পৰি যোৱা বা বিফল হোৱাৰ সম্ভাৱনা থাকে। বহুতে প্ৰথম বা দ্বিতীয়বাৰ বিফল হ’লেই চেষ্টা এৰি দিয়ে। কিন্তু যিয়ে হাৰ নামানি চেষ্টা অব্যাহত ৰাখে, তেৱেঁইহে সফল উদ্যোগী হ’ব পাৰে।
বিল গেট্চৰ মতে উদ্যোগীসকলৰ বাবে আটাইতকৈ গুৰুত্বপূৰ্ণ আৰু সংঘাতৰ অধ্যায়টো হ’ল উৎপাদন কৰা সামগ্ৰী বিক্ৰী কৰা। এটা নতুন বস্তু বনোৱাটো সহজ হ’লেও বজাৰত তাক বিক্ৰী কৰাটো সহজ নহয়। গতিকে বিক্ৰী কৌশল বা বিপণন দক্ষতা থকাটো এজন উদ্যোগীৰ বাবে অতি প্ৰয়োজনীয়। এই সকলোবোৰ প্ৰত্যাহ্বান আৰু কঠোৰ পৰিশ্ৰম কৰিব লগা হোৱাৰ বাবেই উদ্যোগী হোৱাতকৈ সফল উদ্যোগী হোৱাটো অধিক কঠিন।
৬। “ভাৰতৰ সৰ্বতোকালৰ এজন সফল ব্যৱসায়ী ধীৰুভাই আম্বানীৰ হাতত মূলধনো নাছিল।” ধীৰুভাই আম্বানীয়ে হাতত মূলধন আৰু শিক্ষাগত অৰ্হতা নথকাকৈ কেনেকৈ এজন সফল উদ্যোগী হ’ব পাৰিছিল, বৰ্ণনা কৰা।
উত্তৰ: ধীৰুভাই আম্বানী আছিল ভাৰতৰ এজন সফল ব্যৱসায়ী। তেওঁৰ হাতত কোনো মূলধন বা ভাল শিক্ষাগত অৰ্হতা নাছিল। তেওঁ মেট্ৰিকতে শিক্ষা সমাপ্ত কৰি প্ৰথমে এটা পেট্ৰল ডিপোত তেল ভৰোৱা কাজ কৰিছিল আৰু নিজৰ কামৰ বাবে ডিপোটোৰ মেনেজাৰ পদলৈ পদোন্নতি লাভ কৰিছিল। কিন্তু মনত থকা উদ্যোগী হোৱাৰ দুৰ্বাৰ হাবিয়াসৰ বাবে তেওঁ চাকৰি এৰি ব্যৱসায় কৰাৰ সিদ্ধান্ত লয়।
তেওঁৰ হাতত নিজৰ মূলধন নথকাৰ বাবে তেওঁ অসমীয়া ফকৰা যোজনা “তোমাৰ বাৰীৰে বাঁহ গাজ আনি তাৰে কৰিছোঁ খৰিচা, তোমাতে সলাই ধানদোন লৈছোঁ কথাটো মন কৰিছা” সঠিকভাৱে প্ৰয়োগ কৰিছিল। অৰ্থাৎ তেওঁ ৰাইজৰ পৰা ধন লৈ কাপোৰ তৈয়াৰ কৰিছিল আৰু সেই কাপোৰ পুনৰ ৰাইজকে বিক্ৰী কৰি লাভ অৰ্জন কৰিছিল। তাৰ পিছত সেই লাভাংশৰ ভাগ অংশীদাৰসকলৰ মাজতো বিতৰণ কৰিছিল। এইদৰে তেওঁ প্ৰমাণ কৰিছিল যে মূলধনৰ অভাৱ উদ্যোগী হোৱাৰ ক্ষেত্ৰত কেতিয়াও অন্তৰায় বা বাধা হ’ব নোৱাৰে।
তেওঁ মুম্বাইৰ এটা ৩৫০ বৰ্গফুটৰ কোঠাৰ পৰা কাপোৰৰ ব্যৱসায় আৰম্ভ কৰিছিল, য’ত সম্বল হিচাপে কেৱল এখন টেবুল, তিনিখন চকী আৰু এটা টেলিফোন আছিল। তাৰ পৰাই তেওঁ ‘ৰিলায়েঞ্চ কমাৰচিয়েল কৰ্পোৰেচন’ স্থাপন কৰে, যিটো পৰৱৰ্তী সময়ত বিখ্যাত ‘ৰিলায়েঞ্চ ইণ্ডাষ্ট্ৰীজ’ হৈ পৰে। ধীৰুভাই আম্বানীয়ে বিশ্বাস কৰিছিল যে নতুন ধাৰণা বা চিন্তাৰ ওপৰত কাৰো একাধিপত্য নাথাকে আৰু সদায় ডাঙৰকৈ, খৰতকীয়াকৈ তথা আনতকৈ আগতকৈ ভাবিব লাগে।
৭। ছাত্র-ছাত্রীসকলক উদ্যোগী হিচাপে মানসিকভাৱে প্ৰস্তুত কৰি ৰাখিবলৈ কি কি কৰিব পৰা যায়?
উত্তৰ: ছাত্ৰ-ছাত্ৰীসকলক উদ্যোগী হিচাপে মানসিকভাৱে প্ৰস্তুত কৰি ৰাখিবলৈ তলত দিয়া পদক্ষেপসমূহ গ্ৰহণ কৰিব পাৰি:
১। ছাত্ৰ-ছাত্ৰীসকলক উপযুক্ত প্ৰশিক্ষণ আৰু অভিৰোচন প্ৰদান কৰিব লাগে, যাৰ দ্বাৰা তেওঁলোকৰ মাজত আত্মবিশ্বাস, ইচ্ছাশক্তি, আগ্ৰহ, দক্ষতা, স্বাধীনচিতীয়া আৰু সৃষ্টিশীল মন গঢ়ি তুলিব পৰা যায়।
২। মহাবিদ্যালয়, বিশ্ববিদ্যালয় আৰু অভিযান্ত্ৰিক মহাবিদ্যালয়সমূহত গঠন কৰা উদ্যোগী কোষসমূহৰ সৈতে ছাত্ৰ-ছাত্ৰীসকলক জড়িত কৰাব লাগে।
৩। এই উদ্যোগী কোষসমূহে নিয়মিতভাৱে আয়োজন কৰা কৰ্মশালা আৰু প্ৰশিক্ষণ আদিত ছাত্ৰ-ছাত্ৰীসকলে ছাত্ৰ অৱস্থাৰ পৰাই অংশগ্ৰহণ কৰিব লাগে।
৪। ছাত্ৰ-ছাত্ৰীসকলে কেৱল চাকৰিৰ আশাত পঢ়াৰ পৰিৱৰ্তে সমান্তৰালভাৱে নিজকে ব্যৱসায় বা উদ্যোগ আৰম্ভ কৰি নিজৰ জীৱিকা অৰ্জন কৰাৰ বাবে মানসিকভাৱে সাজু কৰি তুলিব লাগে।
৮। চমুটোকা লিখা:
টমাচ আলভা এডিচন, ৰাডাৰফৰ্ড, আলেকজেণ্ডাৰ গ্রাহামবেল, চেষ্টাৰ কাৰ্লচন, বিল গেট্চ, উইলিয়াম শ্বেইক্সপীয়েৰ, জুবিন গাৰ্গ, অংগৰাগ পাপন মহন্ত।
উত্তৰ: পাঠ্যপুথিত থকা তথ্যৰ ওপৰত ভিত্তি কৰি তলত দিয়া ব্যক্তিসকলৰ চমুটোকা আগবঢ়োৱা হ’ল:
১। টমাচ আলভা এডিচন:
টমাচ আলভা এডিচন হ’ল এজন বিখ্যাত বৈজ্ঞানিক। তেওঁ বিদ্যুৎ চালিত বাল্ব তৈয়াৰ কৰোঁতে বাৰে বাৰে বিফল হৈছিল। তেওঁ মন্তব্য কৰিছিল যে তেওঁ বিফল হোৱা নাই, কেৱল এনে ১০০০০ টা উপায় বুজি পাইছে যিবোৰে কাম নকৰে।
২। ৰাডাৰফৰ্ড:
ৰাডাৰফৰ্ড আছিল আমেৰিকাৰ ৰাষ্ট্ৰপতি। তেওঁৰ সন্মুখত আলেকজেণ্ডাৰ গ্ৰাহাম বেলে নিজৰ আৱিষ্কাৰ প্ৰদৰ্শন কৰিছিল। তেওঁ যন্ত্ৰটো চাই কৈছিল যে এইটো এটা আচৰিত আৱিষ্কাৰ হ’লেও ইয়াক কোনে ব্যৱহাৰ কৰিব বা কোনে ল’ব।
৩। আলেকজেণ্ডাৰ গ্ৰাহামবেল:
আলেকজেণ্ডাৰ গ্ৰাহামবেল আছিল এজন ডেকা আৱিষ্কাৰক। তেওঁ ১৮৭৬ খ্ৰীষ্টাব্দত এটা যন্ত্ৰ উদ্ভাৱন কৰিছিল। সহায়ৰ বাবে বহু লোকৰ ওচৰলৈ গৈ নিৰাশ হোৱাৰ পাছত তেওঁ আমেৰিকাৰ ৰাষ্ট্ৰপতি ৰাডাৰফৰ্ডৰ সন্মুখত নিজৰ আৱিষ্কাৰ প্ৰদৰ্শন কৰিছিল।
৪। চেষ্টাৰ কাৰ্লচন:
চেষ্টাৰ কাৰ্লচন আছিল এজন আৱিষ্কাৰক। তেওঁ ১৯৪০ চনত নিজৰ আৱিষ্কাৰ ২০ টা কোম্পানীৰ ওচৰত প্ৰদৰ্শন কৰিছিল কিন্তু কোনেও গ্ৰহণ কৰা নাছিল। তাৰ পাছত ১৯৪৭ চনত নিউয়ৰ্কৰ হেলয়ড নামৰ কোম্পানীয়ে ইয়াৰ স্বত্ব কিনিছিল, যিটো পিছলৈ জেৰক্স কৰ্পৰেচন নামেৰে জনাজাত হয়।
৫। বিল গেট্চ:
বিল গেট্চ হ’ল বিশ্ববিখ্যাত উদ্যোগী আৰু মাইক্ৰ’ছফ্টৰ প্ৰতিষ্ঠাপক। তেওঁ কৈছিল যে দুখীয়া হৈ জন্ম লোৱাটো ভুল নহয়, কিন্তু দুখীয়া হৈ মৃত্যুবৰণ কৰিলেহে সেয়া নিজৰ ভুল হয়।
৬। উইলিয়াম শ্বেইক্সপীয়েৰ:
উইলিয়াম শ্বেইক্সপীয়েৰ এজন সাহিত্যিক আছিল। তেওঁ কৈছিল যে আমাৰ ভাগ্য গ্ৰহ নক্ষত্ৰই নিৰূপণ নকৰে, ই আমাৰ নিজৰ ভিতৰতহে থাকে।
৭। জুবিন গাৰ্গ:
জুবিন গাৰ্গ হ’ল অসমৰ এজন জনপ্ৰিয় শিল্পী। নিজৰ উদ্ভাৱনী শক্তি আৰু কৰ্মশক্তিৰে নিজকে প্ৰতিষ্ঠা কৰাৰ বাবে পাঠটিত তেওঁক এজন উদ্যোগী বুলি উল্লেখ কৰা হৈছে।
৮। অংগৰাগ পাপন মহন্ত:
অংগৰাগ পাপন মহন্ত হ’ল এজন জনপ্ৰিয় শিল্পী। নিজৰ ইচ্ছা অনুসৰি কাম কৰি নিজকে সমাজত প্ৰতিষ্ঠা কৰাৰ বাবে তেওঁকো একোগৰাকী উদ্যোগী বুলি কোৱা হৈছে।
৯। সমাৰ্থক শব্দ লিখা:
প্ৰভাত, কঠিন, এলেহুৱা, ডাঙৰ, চেষ্টা, লগৰীয়া, লক্ষ্য, নিৰৱচ্ছিন্ন, হাবিয়াস, সপোন।
উত্তৰ: ১। প্ৰভাত — পুৱা
২। কঠিন — টান
৩। এলেহুৱা — অলস
৪। ডাঙৰ — বৃহৎ
৫। চেষ্টা — যত্ন
৬। লগৰীয়া — সংগী
৭। লক্ষ্য — উদ্দেশ্য
৮। নিৰৱচ্ছিন্ন — অবিৰাম
৯। হাবিয়াস — হেঁপাহ
১০। সপোন — স্বপ্ন
১০। বিপৰীতার্থক শব্দ লিখা: নতুন, ক্ষুদ্র, সফল, কর্মহীন, এলেহুৱা, সহজ, সপোন, সুবিধা, আৰম্ভ, জন্ম, সমান।
উত্তৰ: ১। নতুন — পুৰণি
২। ক্ষুদ্ৰ — ডাঙৰ
৩। সফল — বিফল
৪। কৰ্মহীন — কৰ্মব্যস্ত
৫। এলেহুৱা — পৰিশ্ৰমী
৬। সহজ — টান
৭। সপোন — দিঠক
৮। সুবিধা — অসুবিধা
৯। আৰম্ভ — শেষ
১০। জন্ম — মৃত্যু
১১। সমান — অসমান
১১। তুমি কথা-বতৰা পাতোঁতে সাৱধান হ’বা। মনে পঢ়া-শুনা কৰি আছে। গাড়ী দুখন অগা-পিছাকৈ গৈ আছে। ওপৰৰ বাক্যকেইটাৰ দৰে তলত দিয়া যুৰীয়া শব্দবোৰেৰে বাক্য সাজা:
ল’ৰা-ছোৱালী, হাত-ভৰি, খুৱাই-বুৱাই, জীৱন-জীৱিকা, পা-পইচা।
উত্তৰ: ১। ল’ৰা-ছোৱালী: চোতালত সৰু সৰু ল’ৰা-ছোৱালীবোৰে উমলিবলৈ লৈছে।
২। হাত-ভৰি: ধূলি-বালি লাগিলে আমি সদায় চাবোনেৰে হাত-ভৰি ধুব লাগে।
৩। খুৱাই-বুৱাই: মায়ে সৰু মেকুৰী পোৱালীটোক মৰমেৰে খুৱাই-বুৱাই শুৱাই থ’লে।
৪। জীৱন-জীৱিকা: গাঁৱৰ খেতিয়কসকলে খেতি-বাতিৰ ওপৰতেই নিজৰ জীৱন-জীৱিকা চলাই ৰাখে।
৫। পা-পইচা: বজাৰলৈ যাওঁতে অলপ পা-পইচা লগত লৈ যোৱাটো দৰকাৰী।
১২। ভাব সম্প্ৰসাৰণ কৰা:
(ক) উদ্যোগী পুৰুষ সিংহৰ সমান, এলেহুৱা কাপুৰুষৰ সমান।
(খ) যি মূলা বাঢ়ে তাৰ দুপাততে চিন।
(গ) শুই থকা শিয়ালে হাঁহ ধৰিব নোৱাৰে।
উত্তৰ: ১। উদ্যোগী পুৰুষ সিংহৰ সমান, এলেহুৱা কাপুৰুষৰ সমান:
এই বাক্যশাৰীৰ দ্বাৰা পৰিশ্ৰম আৰু এলাহৰ মাজৰ পাৰ্থক্য বুজোৱা হৈছে। যিদৰে সিংহ বনাঞ্চলৰ আটাইতকৈ শক্তিশালী আৰু সাহসী প্ৰাণী, ঠিক তেনেকৈ যিসকল মানুহ উদ্যোগী অৰ্থাৎ পৰিশ্ৰমী, তেওঁলোকে নিজৰ সাহস আৰু কষ্টৰে সকলো বাধা অতিক্ৰম কৰিব পাৰে। আনহাতে, এলেহুৱা মানুহবোৰ কাপুৰুষৰ দৰে। তেওঁলোকে ভাগ্যৰ ওপৰত ভৰসা কৰি বহি থাকে আৰু জীৱনত কেতিয়াও সফলতা লাভ কৰিব নোৱাৰে।
২। যি মূলা বাঢ়ে তাৰ দুপাততে চিন:
এই প্ৰবাদ ফাঁকিৰ অৰ্থ হ’ল যে যিকোনো মানুহৰ ভৱিষ্যতৰ সম্ভাৱনা অতি কম বয়সতে বা প্ৰথম অৱস্থাতে বুজি পোৱা যায়। যেনেকৈ এখন খেতিপথাৰত ভালদৰে ডাঙৰ হ’বলগীয়া মূলা গছজোপাৰ গুণাগুণ তাৰ প্ৰথম দুটা পাত ওলোৱাৰ সময়তেই ধৰিব পাৰি, ঠিক তেনেদৰে এজন শিশুৱে ডাঙৰ হৈ কেনেকুৱা গুণৰ অধিকাৰী হ’ব, তাৰ উমান তেওঁৰ সৰুকালৰ চাল-চলন আৰু স্বভাৱতে পোৱা যায়।
৩। শুই থকা শিয়ালে হাঁহ ধৰিব নোৱাৰে:
এই ফাঁকি কথাৰ অৰ্থ হ’ল কাম নকৰাকৈ বহি থাকিলে জীৱনত একোৱেই লাভ কৰিব নোৱাৰি। শিয়াল এবিধ চতুৰ প্ৰাণী হ’লেও সি যদি কেৱল শুই থাকে, তেন্তে সি নিজৰ বাবে খাদ্য কেতিয়াও চিকাৰ কৰিব নোৱাৰে। তাৰ বাবে সি কষ্ট কৰিবই লাগিব। ঠিক সেইদৰে, যিমানেই বুদ্ধিমান নহওক কিয়, কোনো মানুহে যদি এলাহ কৰি বহি থাকে, তেন্তে তেওঁ জীৱনত কেতিয়াও সফলতা বা নিজৰ লক্ষ্য লাভ কৰিব নোৱাৰে।
১৩। লিংগ পৰিৱৰ্তন কৰা: শিক্ষক, ছাৰ, ছাত্ৰ, পুৰুষ, বন্ধু।
উত্তৰ: ১। শিক্ষক — শিক্ষয়িত্ৰী
২। ছাৰ — বাইদেউ
৩। ছাত্ৰ — ছাত্ৰী
৪। পুৰুষ — মহিলা
৫। বন্ধু — বান্ধবী
অতিৰিক্ত (Extras/additional)
প্ৰশ্নোত্তৰ (Questions and Answers)
শীঘ্ৰেই উপলব্ধ হ’ব
বহুনিৰ্বাচনী প্ৰশ্ন (MCQs)
শীঘ্ৰেই উপলব্ধ হ’ব
Get notes of other classes and subjects
Leave a Reply